නෙතු කඳුලු වලින් බොරු නොකර ඉඳින්

සහෝදරයෙක්.... කියන්නේ ජීවිතයට ලොකු සම්පතක්. අවංක සහෝදරත්වය තුල මිල කළ නොහැකි

වටිනාකමක් තිබෙනවා. විශේෂයෙන්ම අයියා කෙනෙක් ඉන්න පවුලක තියන හයිය වචනයෙන් විස්තර කරන්නට බැහැ. ඒ වගේම සහෝදරයා කියන වචනයටවත් ගරු නොකරන නීච මිනිසුන් නැතුවාම නොවෙයි. එවන් මිනිසුන් කිසිදු බැඳීමක්, ඒ වගෙම ඒ බැඳීමක තිබෙන වටිනාකම හඳුනන්නන් නොවෙයි. ඉතින්... අයියා - නංගි බැඳීම ගැන කතා කරනවනම් අයියලා හරි ආදරෙයි තමන්ගේ නංගිලාට. සමහර අයියලා තමන්ගේ ආදරේ හොඳින්ම පෙන්නනවා, නමුත් සමහරුන් තමන්ගේ ආදරේ නංගිට පෙන්නන්නේ නෑ. ඒක තියෙන්නේ එයාලගේ හිතේ. මටත් ඉන්නවා ඔන්න ඔය දෙවෙනි කාණ්ඩයට අයිති වෙන අයියා කෙනෙක්. ඒ වගේමයි ගෙදරක විශාල වගකීම් ප්‍රමාණයක් අයියගේ කරමතට පැටවෙන්නේ නිතැතින්මයි. ආදර්ශවත් අයියා කෙනෙක්... නිවෙසට හොඳ පුතෙක් විදියට එයාලා නිහඬවම තමන්ට දැනෙන වේදනාවන් විඳ දරා ගන්නවා. මම මේ කියන්න යන්නේ ඒ වගේ අයියා කෙනෙක් ගැන.

ඔහු... තමන්ගේ නංගිට බොහෝ ආදරය කරන අයියා කෙනෙක්. ඔහු... නංගිත් එක්ක දුකට සැපට හැම මොහොතකම ඉන්න අයියා කෙනෙක්. ඔහු... තම නංගිට කෙනෙක් කිසිම වචනයක් කියනවට අකමැති අයියා කෙනෙක්. ඒත් අවාසනාවට ඔහු නොදැනුවත්වම නංගි ඇයගේ කුඩා වයසට නොගැලපෙන දෙයක් කරනවා.

නෙතු කඳුලු වලින් බොරු නොකර ඉඳින්
මගෙ පුංචි නගේ රවටා දෙගුරුන්
නුඹ ඇයිද නගේ පෙම් බස් දෙඩුවේ
කිරි සුවඳ මුවින්

ඇය.... තුරුණු වියට එළඹෙමින් සිටින යුවතියක්. ප්‍රේමයක පැටලී ඇති හැඩයි. මේ පලහිලව්ව නිවසේ දෙමව්පියන් දැන ගත් පසු ඇය කුමක්ද කරන්නේ දෙමව්පියන් ඉදිරියේ ඇඬූ කඳුලින් පසුවෙනවා. නමුත් මේ අයියට කේන්තියි. ඒ නිසාමයි ඔහු පවසන්නේ "නෙතු කඳුලු වලින් බොරු නොකර ඉඳින්" ලෙසට. මොකද ඔහු දන්නවා ඇය මේ හෙලන්නේ කිඹුල් කඳුලු බව. ඔහු අහනවා ඇයගෙන් නුඹ ලමාවිය පසු කලා පමණයි. මේ නුඹට පෙම් කරන්න වයසක්ද. ඇයි නුඹ මෙවැන්නක් කලේ.

අරුතේ ඉන්න අයියලා නංගිලා බොහෝ අය මේ සිද්ධියට මුහුණ දී ඇති කියලා මම හිතනවා. පාසල් ප්‍රේමය කොපමණ යෝග්‍ය නොවන්නක් වුවත් අපි බොහෝවිට ඒ කාලයේදි එය නොගැලපෙන්නක් බව විශ්වාස කරන්නේ නෑ. ඉතින්... මේ අයියා තව දුරටත් තමන්ගේ නංගිගෙන් මෙහෙම අහනවා ;

සෙල්ලම් ගෙදරින් සමුගත් පමණින්
කොයිබින්ද සිතේ අනුරාග හැඟුම්
කෙලෙසින්ද නගේ පෙම්පත් ලියුවේ
මුදු සිනිඳු අතින්

පෙර කීවාක් මෙන් ඇය ලමා විය පසු කලා පමණයි. මෙතනදිත් ඔහු අහනවා, නුඹ සෙල්ලම් ගේ අතෑරියා පමණයි තවම. මෙච්චර ඉක්මනට ආදරණීය හැඟුම් සිතට ආවේ කොහොමද. නුඹෙ දෑත් තවමත් කිරිකැටි දෑත් හරිම සිනිඳුයි. නුඹ කොහොමද ප්‍රේමණීය ලියුම් ලියන්නේ. ඔහුට ඇය තවමත් කුඩා දැරියක්. ඔහුට විශ්වාස කරන්නට අපහසුයි ඇය ආදරවන්තියක් බව. මන්ද ඇය තවමත් පාසල් යන කුඩා දැරියක් බැවින්.

පාසල් සෙවණින් සමුගන්න කලින්
සිත මන්ද නගේ අඳුරේ මෙතරම්
අවලාද හඬින් ගම්මානෙ පිරේ
දැන් හොඳද ඉතින්

ඇගේ මේ ක්‍රියාකලාපය නිසාම ගමේ මිනිසුන් ඇයට සහ ඇගේ පවුලට නිග්‍රහ කරනවා. මෙතනදි ඔහු කියනවා, පාසලෙන් පිට වෙන්නත් කලින් ඇයි නුඹ නුඹේ අනාගතය අඳුරු කරගන්නට හදන්නේ... ඇයි නුඹ කැළලක් ඇති කරගන්නට හදන්නේ. ඒක හොඳ දෙයක්ද... නුඹට ඕනා නුඹේ මුලු ජීවිතයම අඳුරට හෙලන්නද... මේ අයියා දන්නවා තමන්ගේ නංගිට මුළු ගමම කතා හදන බව. ඔවුන් කොපමණ මේ කාරණය ඉවසාගෙන හිටියත් අයියට තරහයි ඇය ඔහු කියන දේ නොඅසන නිසාම. මේ නිසාමයි ඔහු අහන්නේ "අවලාද හඬින් ගම්මානෙ පිරේ
දැන් හොඳද ඉතින්" යනුවෙන්. ඔවුන්ට මේ අවමාන විඳදරා ගන්නට අමාරුයි. ඒත් ඇය ඔවුන්ගේ කීම් නොඇසුනා සේ සිටිනවා.

මේ ගීතය තුළ කියන්නට, පැහැදිලි කරන්නට මහා සංකීර්ණ කාරණා නොමැති වුවත්... සහෝදරයකුගේ සිතෙහි ඇතිවෙන වේදනාව, කණස්සල්ල මනාව පිළිඹිබු කරන ගීතයක් ලෙස මෙය හැඳින්විය හැකියි. මේ ගීතය තුළින් අරුතේ ඉන්න අයියලා නංගිලා බොහොමයක්ගේ මතකය අවදි වනු නොඅනුමානයි.

තම නංගිලාට ආදරය කරන අයියලාට මේ ගීතය උපහාරයක්ම වේවා... !!!

නෙතු කඳුලු වලින් බොරු නොකර ඉඳින්
මගෙ පුංචි නගේ රවටා දෙගුරුන්
නුඹ ඇයිද නගේ පෙම් බස් දෙඩුවේ
කිරි සුවඳ මුවින්

සෙල්ලම් ගෙදරින් සමුගත් පමණින්
කොයිබින්ද සිතේ අනුරාග හැඟුම්
කෙලෙසින්ද නගේ පෙම්පත් ලියුවේ
මුදු සිනිඳු අතින්

පාසල් සෙවණින් සමුගන්න කලින්
සිත මන්ද නගේ අඳුරේ මෙතරම්
අවලාද හඬින් ගම්මානෙ පිරේ
දැන් හොඳද ඉතින්

~අකූ ~