වස්සානය සිනා සලයි..(ගී පද කී මට මාල ගිරා)

තම පුතු විසින් සංගීතවත් කල ගීතයක් ගායනය කරන්නට ලැබෙන්නේ නම් මවකට එය මහත් භාග්‍යයක් නොවන්නේද....එමෙන්ම තම ස්වාමියා විසින් සංගීතවත් කල බොහෝ ගීතද ගායනා කරන්නට ඈ වාසනාවන්ත වූවාය.
නමුත් අපගේ අවාසනාවට අද ඈ අප අතර නැත. මාලනී බුලත්සිංහ ගුරු මෑණියනි ඔබ අපේ සිත් තුල සදා අමරණීයයි.......

වස්සානේ සිනා සලයි සිහිනයක් වගේ
ගම්මානේ මිහිර දැනේ අරුමයක් වගේ
ඈත දුර ගෙවා ආයේ වඩිනවා
ඈත දුර ගෙවා ආයේ වඩිනවා
ගී පද කී මට මාල ගිරා


පන් ගසකින් තලන්නම්
කෙහෙ රොද ඇද දුවන්නම්
දෑතේ වෙලී නටන්නම්
නෝක්කාඩු කියන්නම්
බොරු තරහක් අරගෙන මා දිහා බලනවාද
සාවියක වගේ ගුලි වී තුරුලෙ නිදන තුරුම
ගී පද කී මට මාල ගිරා

වස්සානේ සිනා සලයි සිහිනයක් වගේ
ගම්මානේ මිහිර දැනේ අරුමයක් වගේ
ඈත දුර ගෙවා ආයේ වඩිනවා
ඈත දුර ගෙවා ආයේ වඩිනවා
ගී පද කී මට මාල ගිරා

නින්දා ගිණි නිවේවි
මාල හතක් දිලේවී
කිරි සුවඳින් පිරේවි
නැවුම් කවක් ගෙතේවී
සිදාදියට සිත කැන්දා යළිදු නොයනවාද
ගම් දොරකඩ මා නවතා දෙවා කඳුළු සිතට
ගී පද කී මට මාල ගිරා

වස්සානේ සිනා සලයි සිහිනයක් වගේ
ගම්මානේ මිහිර දැනේ අරුමයක් වගේ
ඈත දුර ගෙවා ආයේ වඩිනවා
ඈත දුර ගෙවා ආයේ වඩිනවා
ගී පද කී මට මාල ගිරා
ගී පද කී මට මාල ගිරා

ගායනය - මාලනි බුලත්සිංහල
සංගීතය - කසුන් කල්හාර
ගී පද - විදුර ඩයස්

මේ ගීතය ලියැවෙන්නේ 99/ 2000 කාලයේදී. මෙය එක්වරම බිහිවුන ගීතයක් වන්නේ නෑ. මාලනිය තමාට ගීතයක් ලියාදෙනමෙන් විදුරගෙන් ඉල්ලා සිටිනවා. ඒ ඇය ඔහුගේ දක්ෂතා පිලිබඳව වැටහීමක් තිබෙන නිසාවෙන්. ඔහු විසින් රචිත යුග ගීයක් මාලනියගේ සිත්බැඳ ගන්නා නිසා තමයි මාලනිය එවැනි ඉල්ලීමක් සිදුකරන්නේ. විදුර ඒ සඳහා වැඩි උනන්දුවක් නොදක්වන්නේ මාලනිය නිකම් කියූ දෙයක් කියා සිතායි. නමුත් දෙතුන් වතාවක් ඔහුට මෙය කියන නිසාවෙන් ඔහුට මෙය සිදුකරන්නටම වෙනවා.

මාලනිය මොනාලීසා ඇල්බමය කරන්නට විදුරගෙන් ගී පද රචනාව බලාපොරොත්තු වූවාය. ඇය බලාපොරොත්තුවන්නේ තරමක වේග රිද්ම ගීයකි. කසුන් කල්හාර විසිල් එකක් ගසනුලැබ එයින් විදුර අතින් 'ගී පද කී මට මාල ගිරා' යන පද පෙල ලියැවෙයි. එය එතැනින් අවසන්වේ. යලි ටික කාලයකින් කසුන්ගෙන් විදුරගේ බ්ලූමැන්ඩල් පෙදෙසේ පිහිටි නිවසට දුරකතන ඇමතුමක් ලැබේ. ඒ ගීතය ඉක්මනින්ම නිමකල යුතු බව පවසමිනි. දුරකතනයෙන්ම කසුන් මෙලඩිය ලබාදෙන අතර ඒ මෙලඩියට අනුව ගීතය ලියැවේ.
විදුර අයියා ගීතය ගැන කිව්වේ මෙහෙමයි...

ගීය ලියැවෙන්න කාලයකට පෙර මේ පෙම්වතාට යන්න සිද්ධ වෙන්නේ කොළඹ 15 නම් කුණු කසලින් දූලියෙන් සන්නද්ධ ගෙන්දගම් බිම් පෙතක කුඩා පේලි ගෙයක පදිංචියට, අතැර දා මලින් පිරුණු ගම්මානය.

ඔහු යළි එන්නේ කවදාකදැයි ගම්මානයේ වෙසෙන පෙම්බරිය ඇඟිලි ගනිමින් නිතර බලා සිටි වග කිවමනා නොවෙයි. පඳුරේ රෝස මලක් නෙලා වේලා කවරය ඇතුලට ලා ලිපියක් එවන්නේ සඟවා ගත් කඳුලින්.
ඊටත් වඩා සිය මල්කම් අකුරු නිවැසියනට , මිතුරනට රහසේ අමුණමින්.

කාලාන්තරයක් තිස්සේ හිත් බැඳුනද දෙදෙනාම එකඟව 'හා' කියා ගත්තේ මැයි තුන්වන දාක. ළබැඳුමට තෙමසක් පිරෙත්දී එනම් අගෝස්තු එකොලොස් වන දා දෙදෙනා විරසක වෙයි. විරසක කාලයත් තුන්මසක්. නොවැම්බරයේ තුන් වැනිදා යළි දෙදෙනා මිතුරුවෙයි.

දැන් ඔවුන් විවාහප්‍රාප්තය, මව්පියවරුය. පෙම්වතා පසුකලෙක ගීයකට ලන්නේ ඇගේ විරහ දුකය.