වියෝගයක පෙර නිමිති දැනේ

වියෝගයක පෙර නිමිති දැනේ

අභිනික්මන ළං ළංව පෙනේ .....

ගිළිහී මධු බිඳු රැඳුණු පෙම් වදන්
කෙටිවෙයි කවියෙන් රචිත පෙම් හසුන්
හෝරා දින සති බවට පෙරලමින්
අඩුවී යයි මුණගැසෙන දින ගණන්

නැවතී උතුරා ගැලූ රස කතා
පිළිසඳරේදී වැඩෙයි නිහඬතා
දෙදරා පෙරදා පැවති සබඳතා
මොහොතක් පාසා බිඳෙයි සුහදතා...

නන්දා මාලිනී /සුනිල් ආරියරත්න/ රෝහණ වීරසිංහ

සබඳතාවක් ආරම්භයේදී ජීවිතේ කොයි තරම් නම් වෙනස් කම් සිද්ධ වෙනවාද.. ලෝකෙ හැම සතුටක් ම අයිති වුණා වගේ අපූර්වතම හැඟීමකින් මුලු හිතම පිරිලා යනවා.. තත්පරයක් පාසා බලාපොරොත්තු දැල්වෙනවා..

අපූරු පෙම් කතාවන් පිටු පුරා ලියැවුණු යුගය නැතිවුණේ තාක්ෂණය ආදරය මැද්දට ආවට පස්සේ.. ඊට පෙර හරියටම කිව්වොත් මීට අවුරුදු 15ක ට පමණ පෙර පෙම්වතුන් තමන්ගෙ සිතුම් පැතුම් සුන්දර වචන වලට පත් කරලා අකුරු කළා..

එකිනෙකා හමුවෙන්න කොයිතරම් නම් ප්‍රේමවන්ත හිත් පෙරුම් පුරනවද.. හැම මොහොතකම නොසන්සුන් සිතිවිලි ඔහුගේ.. ඇයගේ දසුන වෙනුවෙන් මග බලා ඉන්නෙ කොතරම් නොඉවසිල්ලෙන්ද..

එහෙම පෙරුම් පුරන පෙම්වත් සිත් උනුන් අභියසදී නොනැවතී දොඩමළු වෙනවා.. තොරතෝංචියක් නැතිව ජීවිතේ වැදගත්ම සුවිශේෂීම කෙනා ළඟදි කතා කරන්නට කොයිතරම් නම් දේවල් තියෙනවාද.. ඒ වචනයක් පාසා වෑහෙන්නෙ සෙනෙහස ආදරය ලෙංගතුකමම නේද..

ඉතින් මේ හැමදේම යම් මොහොතකදි වෙනස් වුණොත්.. ඒ ආදරණීය වදන් ගොළු වුණොත්.. හමුවීම් අතර පරතරය වැඩි වුණොත්.. දෙදෙනා අතර නිහඬතාවයට වැඩි ඉඩක් ලැබුණොත්.. ඒ තිබුණු සුහද ලෙංගතු බැඳීමේ යම් පළුද්දක් ඇති බව හැඟුණොත්..

ඊළඟ නිමේෂයේ කුමක් නම් සිදු වේවිද...


~අමාලි වසුන්දරා අතුකෝරල~