කඳුළැල් සලා දෙනෙත් පියවිලි

කඳුළැල් සලා දෙනෙත් පියවිලි නෑවිලා ඔබේ
ඇයි මිහිරියේ තනි වී කිව මැන කල්පනා ලොවේ...

මතුවේ සිහින් සුසුම් රැළි හද විල් දියේ මගේ
කිසිවක් ලොවේ වෙනත් නැත මට ඔබ තරම් අගේ
රැජිනි ඔබයි උදාරි යෙ මගෙ දිළිඳු ලෝකයේ...

ඇයි මිහිරියෙ තනි වී කිව මැන කල්පනා ලොවේ
කඳුළැල් සලා දෙනෙත් පියවිලි නෑවිලා ඔබේ...

මා වෙසෙන තුරු ලොවේ ඔබ කිසි දිනක තනි නොවේ
හමු වෙන්න එමි ප්‍රියේ අද මෙන් මතු ද මේ භවේ
පිළිගන්න මා රජෙක් ලෙස සනසා දයාවියේ...


ප්‍රේමකීර්ති සංකල්පනාවක්..
ස්ටැන්ලි පීරිස් ස්වර පෙළහරක්..
ගී හඬ අමරණීය ජෝතිපාලයන්..

ඇස් තියෙන්නෙ ලෝකය දකින්න.. ඒ වුණත් හදවතට දැනෙන බොහෝ දේවල් දරාගන්න බැරි වුණ වෙලාවට ඒ හැමදේම කඳුළකට හරවන්නත් ඇස් වලට පුළුවන්..

එහෙම බැළුවොත් බාහිර ලෝකය දිහා බලන්න දීලා තියෙන ඇස් වලින්ම නේද හිතේ ඇතුළෙ දැනෙන දේවල් බාහිර ලෝකයට මුදා හරින්නෙ... තමන් ආදරය කරන කෙනෙක්ගෙ ඇසකට නැගෙන කඳුළ අනිත් කෙනාට දැනෙන්නෙ කොහොමද?

ඔහු සුසුම් හෙලනවා.. ඇයි මේ ඔබ හඬන්නෙ? ඔබ තරම් වටිනා කෙනෙක් මට ලෝකෙ ඉන්නවද? මම කවදාවත් ඔබව තනි නොකර ඔබ ළඟින්ම ඉන්නවා අද වගේම හැම භවයකදිම. ඔබ මට රැජිනක්.. මාවත් රජෙකු ලෙස පිළිගන්න ඔබට පුළුවන් නේද?

ඇයව අමතන්න වචන කීයක් නම් මේ ගීතයේ යෙදිලා තියෙනවාද බලන්න. මිහිරියේ... උදාරියෙ.. ප්‍රියේ.. දයාවියේ..

~අමාලි වසුන්දරා අතුකෝරල~