නෙතු පියන් පියා මුතු දසන් වසානිදි දැහැන් වැදී කුමරී
සිහිනයෙන් වඩී මා ළඟින් ඉඳී
මව් පියන් බලා නො ඉඳී
කැට මුගුරු වැදී තටු සඟළ බිඳී
ඉගිලෙන්නට නොහැකිද කුමාරියේ
සිහින මුවා තටු සලා වරෙන්
සුභ ප්‍රාර්ථනා වෙත කුමාරියේ
නෙතු පියන් පියා...
ඉරිසියා හිති බොරු ගොතා කියූ
ඒ සුරංගනාවන් නිදා සිටී
හිරුට මුහුණු ලා පියාඹපන්
සුභ ප්‍රාර්ථනා වෙත කුමාරියේ
නෙතු පියන් පියා...
ගායනය - බණ්ඩාර අතාවුද
සංගීතය -ගුණදාස කපුගේ
ගේය පද - රත්න ශ්‍රී විජේසිංහ
ජීවිතයේ හැබෑකරගන්නට වෙරදරන හීන ගොඩක් අතරින් ආදරය නැමැති ලෙන්ගතු හීනයක්.....
සැබෑ ලෝකයේ පැමිනෙන දහසකුත් බාධක මැඩගෙන හැබෑකරගන්නට වෙර දරන හීනයක්....
විරහවක් කරා නොගොසින් ආදරයෙන් හිත පතුලම ස්පර්ශ කරන සදානන්ද කරවූ හීනයක්....
ඔබටත් තිබුනාද ...ඒ සිහිනයේ සුන්දරත්වය ඔබ විඳගත්තාද...ඒ සිහිනය සැබෑ ලෝකයේදී දකින්නට ආශාවෙන් සිටියාද ...ඒ සිහිනය සැබෑ කරගත්තාද ...
රත්න ශ්‍රී විජේසිංහයන් විසින් සැබෑකරගත් ඒ සිහිනය ඔබවෙත ගෙනහැර පාන්නෙමි මෙසේ.......
මගේ කුමරිය නින්දේ... නෙතු පියන් වසාගෙන ඇගේ මුතු දසන් වසාගෙන ඇය නින්දේ. සිහිනයකින් ඇය මා ලඟටම ඇවිත්. කිසිවෙකුට දැක ගන්නට බෑ..අඩුම තරමේ ඇගේ මවුපියන්ටවත් ඒ පිළිබඳ දැනීමක් නෑ.
ඈ කිරිල්ලියක්...තටු සලලා ඈතට ලස්සන හොයාගෙන සිත්ගත් ඉසව්වකට පියාඹන්න ඈ බොහොම කැමතියි. ඒත් ඉගිලෙන්නට වෙර දරන ඇයට කැට මුගුරු එල්ලවෙන්නේ නිතැතින්. ඒවා ඇයට ඉවසාගන්නට අපහසුයි. ඒවායින් මිදීමට අපහසුයි. ඇගේ තටු බිඳී ගොසින්ද ...ඉගිලෙන්නට නොහැකිලෙස..එසේනම් සිහිනයෙන් තටු විහිදා මා ලඟටම එන්න. ඔබෙයි මගෙයි ආදරය කරා එන්න...
ආදරයට ඉරිසියාකාරයින් බොහෝයි. උන් කියනා බොරු නිසා නුඹට කෙසේවත් මා සමීපයට එන්නට අපහසුයි...ඒත් පහසු විදියක් තියෙනවා...ඔබෙයි මගෙයි සිහිනය...ඔව් ඒ සිහිනයේදී ඉරිසියාකාරයින් නිදි. හිරු නැගෙන දෙසටම පියඹා එන්න...මා වෙතම...අපේ ආදරය වෙත...
මේ ගීතය බණ්ඩාර අතාවුදයන්ගේ පළමුවන ගීතය වගේම රත්න ශ්‍රී විජේසිංහයන්ගේ ගුවන් විදුලියේ ප්‍රචාරය වූ ප්‍රථම ගීතය. මෙහි කියැවෙන්නේ හරිම ලස්සන කතාවක් වගේම ඔබ අප බොහෝ දෙනෙකුට පොදු කතාවක්. ආදරයකදී දෙමව්පියන් එයට අකමැති වීම බොහෝ ආදර කතා වලට දකින්නට පුළුවන් දෙයක්. එසේ ආදරයකදි එවන් අකමැත්තක් ඇති වුනොත් පෙම්වතුන් ගන්නා ක්‍රියාමාර්ග මොනවාද?
'සුනිල්වන් නුවන් යුග වසා උතුර උතුරා' සෝමතිලක ජයමහ ශූරීන් ගයද්දී දැනෙන හැඟීම කෙලෙසද. පෙම්වතා විසින් පෙම්වතියගේ දෙමව්පියන්ගෙන් අහිංසක ඉල්ලීමක් සිදුකරනවා ඔවුන්ගේ සම්බන්දයට ආශීර්වාද කරන ලෙස. දෙමාපියන්ගේ අකමැත්ත නිසා ඔවුන් විඳිනා දුක මනාවට පෙන්වා දෙනවා.
සමහර විටෙක දෙමාපියන්ගේ කැමැත්ත අකමැත්ත නොසලකා පෙම්වතියව බලෙන් රැගෙන යන අවස්තාද නැත්තේ නොවේ.
ගීතයේදී දෙමාපියන් මේ සම්බන්දයට දැඩි ලෙස විරුද්ධ වන බවක් පෙන්වනවා. ඒ නිසාවෙන්ම සිහිනයක් මගින් දෙදෙනා ආදරය කරන්නට පෙලඹෙනවා...සිහිනයේදි සැබෑ ලොවේ තියෙන බාධක කිසිවක් නෑ. ආදරය ජයගන්නට පුළුවන් පහසුවෙන්ම.
ඉතින් මේ ගීතයේ තවත් විශේෂත්වයක් වන්නේ මෙය රත්න ශ්‍රී විජේසිංහයන්ගේ සැබෑ ජීවිත කතාව වීමයි. ගීතයේ කියැවෙන ආකාරයටම ඔවුන්ගේ ආදරයට දෙමවුපියන්ගෙන් බාධාවන් එල්ල වෙනවා. ඇයව දකින්නට ලැබෙන්නෙවත් නැති තත්වයකට පත්වෙනවා. ඒත් එසේවූ නියාවෙන් ආදරය නතර කරන්නට ඔවුන් සූදානම් නෑ. සිහිනයන් මගින් ආදරයේ මිහිරියාව විඳින්නට සමත් වෙනවා. කෙසේහෝ රත්න ශ්‍රී ආදරයෙන් ජයගන්නවා.
ගීතය සංගීතවත් කරන්නේ විශාරද ගුණදාස කපුගේ ශූරීන් විසින්. ගේයපද වල තිබෙන සුන්දරබව තවත් තීව්‍ර කිරීමට සංගීත නිර්මාණය උපකාර වී තිබෙන බව ඔබට වැටහේවි හොඳින් ගීතය රසවින්දනය කලොත්. බණ්ඩාර අතාවුදයන්ගේ හඬ ගැන යමක් කිව යුතුමයි. ඔහුට තිබෙන්නේ ඔහුටම අනන්‍ය වූ හඬක්. ඔහුගේ ගීතයේ ඔහුගේ සලකුණ තබන්නට සමත්වීම කැපී පෙනෙනවා.
~තේජන අබේදීර~
No comments:
Post a Comment