අහසින් තරුවක් කඩා වැටෙනවා....

අහසින් තරුවක් කඩා වැටෙනවා
තරුව කතා නැහැ අහසයි වැළපෙන්නේ
නටුවෙන් නෑඹුල් මලක් වැටෙනවා
මලේ කතා නැ සුළඟයි වැළපෙන්නේ

පෑහිමක් නැ නොකෙරෙන දීගේ - සෙවනැල්ලක් ඇද ලූ
දවල් වැටුනු වල මෙදා වැටුනේ රෑ - හිත හොද වැඩිකම ලූ

අහසින් තරුවක්....

මලෙන් උපන් මල් පත්තිනි දේවී - කැන්දන් එන නැකතේ
ඇස් කූඩෙන් මං වතුර අදින්නම් - ඔබේ මඟුල් දවසේ

අහසින් තරුවක්....

ගායනය.... මාලනී බුලත්සිංහල

මම මේක නිතරම අහන ගීතයක්. මොකද ඇය මගේ ප්‍රියතම ගායිකාවන්ගෙන් කෙනෙක්. ඉතින් ඒක නිසා මට හිතුනා මේ ගීතය ගැන කතා කරන්න ඕනා කියලා.

මේකයි කතාව.......... :

ඇය එක් වරක් අමාරුවේ වැටුන තරුණියක්. ඒ කියන්නේ අනාථ වුන තරුණියක්. සමහරවිට ඇය කලින් විවාහ වුන කෙනෙක් විය හැකියි. දෙවෙනි පාර ඇය හිතනවා ඇයට වැරදෙන එකක් නැහැ කියලා. නමුත් අවාසනාවක මහත....!! ඇය නැවත වරක් පෙර ලෙසම රැවටෙනවා. මේ බිඳ වැටීම් නිසාම ඇයගේ හිත ශක්තිමත්. ඇය ඇයගේ දෙවෙනි ප්‍රේමවන්තයාගේ නික්ම යාම ඇය ඉතා ශක්තිමත් ලෙස දරා ගන්නවා.


පෙම්වතා ඇය අත් හරින්න හදන්නේ ඔහුගේ උවමනාවට. ඒ කියන්නේ ඇයගේ චරිතය හොඳ නැති කෙනෙක් ලෙස අන් අය සිතන නිසා. ඇතැම් විට දෙමාපියන්ගේ බලපෑමකට. මොකද හැම දෙමාපියෙක්ම තමන්ගේ පුතාට හොයන්නේ හොඳ බිරිඳක්. ඉතින් ඇයට කලින් සිදුවුන වැරැද්ද නිසා පෙම්වතාගේ දෙමාපියන් ඇයට විරුද්ධ වෙනවා වෙන්නත් පුළුවන්.

මේ හේතුව නිසා ඇයගේ හිතේ තරහකුත් තියනවා. ඒ කියන්නේ පෙම්වතාට කෙලින් තීරණයක් ගැනීමට නොහැකිකම නිසා. ඇය ඒකටත් නෝක්කාඩු කියනවා. මොකද ඇයව අත හරින්න හදන පෙම්වතා ඒ ගැන දුක් වෙනවා, අඬනවා. ඒත් ඇය නිහඬයි. සිදු වූ දේවල් නිසා ඇයගේ හිත ගලක් වෙලා. ඒත් ඇයට ඔහුගේ වැලපීම පේන්නේ මවාපෑමක් විදියට. ඒ නිසාම ඇය අහනවා "මමයි අඬන්න ඕනා.... වැලපෙන්න ඕනා. මටයි වැරදුනේ... ඇයි ඉතින් ඔයා අඬන්නේ"

ඇයට දැනෙනවා ටික දවසක ඉඳන් ඔහු ඇයව මඟහරින බව. ඇය අඟවනවා ඔහුට, ඇයට ඔහුගේ වෙනස දැනුන බව. ඇය කියනවා ඔහුට, "මේක වෙන්නේ නැති දෙයක් විදියටයි ඔයා හැසිරෙන්නේ. ඒක නිසා ඔයාට අපේ සම්බන්ධේ වැරදි ඇරෙන්න වෙන දෙයක් පේන්නේ නෑ".

දෙමව්පියන්ගේ කැමැත්තට ඔහු වෙන කෙනෙක් සමඟ විවාහ වෙයි කියලා ඇය හිතනවා. ඇය ඔහුට කියනවා මෙහෙම "ඔයා එක්කගෙන එන්නකෝ පතිවත රකින මලක් වගේ කෙනෙක්ව. ඔයා හිතනවා නම් මම ඒක දැකලා සතුටෙන් ඉඳියි කියලා. ඒක වෙන්නේ නෑ කවදාවත්.

ඉතින් මොකක්ද මේ ගීතය.....

අහසින් තරුවක් කඩා වැටෙනවා
තරුව කතා නැහැ අහසයි වැලපෙන්නේ
නටුවෙන් නෑඹුල් මලක් වැටෙනවා
මලේ කතා නැහැ සුලඟයි වැලපෙන්නේ

ඔයාගේ අහසේ තරුවක් වුන මම ඔයාගේ අහසෙන් කඩාගෙන වැටෙනවා... තරුණ විය ඉක්මවා නැති මලක් වුන මම.. ඒ මල පරවෙන්න කලින්ම, ඒ කියන්නේ අපේ විවාහයට පෙරම බිමට වැටෙනවා.... මම ඒක නිහඬවම දරා ගන්නම්. ඇයි ඔයා වැලපෙන්නේ...!

පෑහීමක් නැහැ නොකෙරෙන දීගේ
සෙවනැල්ලත් ඇද ලූ
දවල් වැටුනු වල මෙදා වැටුනි රෑ
හිත හොඳ වැඩිකම ලූ

මගේ හිත හොඳ වැඩිකමට මම එක පාරක් අමාරුවේ වැටුනා. ඒත් මම හිතුවා ඔයා මට එහෙම කරන එකක් නැහැ කියලා. ඒත් ඔයත් හැසිරුනේ මේක කෙරෙන්නේ නැති තැනටමයි.

මලෙන් උපන් මල් පත්තිනි දේවී
කැන්දන් එන නැකතේ
ඇස් කූඩෙන් මම වතුර අදින්නම්
ඔබේ මඟුල් දවසේ

ඔයා හොයන්නේ මම වගේ කෙනෙක්ව නෙමෙයි. මලෙන් ඉපදුන පතිවත රකින කෙනෙක්ව. ඔයා හොයගෙන එක්කගෙන එන්නකෝ එහෙම කෙනෙක්ව. "මලෙන් උපන් මල් පත්තිනි දේවී" මේ කොටසින් නෝක්කාඩුවක්, ඇයගේ හිතේ තරහක් ප්‍රකාශ කරනවා. පත්තිනි දේවිය කියන්නේ පතිවෘතාව අතින් අග්‍රගන්‍යයේ ලා සැලකෙන දෙවඟනක්. ඇයට අවශ්‍ය ඔහුට රිද්දන්න. ඒ නිසායි ඇය මේ විදියට කියන්නේ. ඔයා හිතනවානම් පත්තිනි දේවිය වගේ පිරිසිදු කාන්තාවන් අද හොයගන්න පුළුවන් කියලා. එහෙමනම් එහෙම කෙනෙක් හොයගෙන පෙන්නන්න බලන්න. එහෙම අය ඉන්නවනම් මට හිල් කූඩයකින් වතුර අදින්නත් පුළුවන්. ඇය මෙතනදි අදහස් කරන්නේ වැරදි නොකරපු අය අද කාලේ හොයා ගන්න බැහැ කියන එකයි.

ප.ලි. : අවසන් පද පේළි දෙකේ අර්ථය වෙනස් කලා. ‪#‎Dilani_Welvitigoda‬ උදව් කලාට ගොඩාක් ස්තුතියි

~ අකූ ~

අකුෂ්ලා ප්‍රනාන්දු